ჩიკაგოდან თბილისამდე – მიუზიკლი საქართველოშია – როგორ იქცა ის ჟანრის ლეგენდად?
20 და 21 სექტემბერს ქართველი მაყურებლის წინაში „ჩიკაგო“ წარდგა – მიუზიკლი, რომელში მოთხრობილი ისტორია და ქორეოგრაფიულ-მუსიკალური ნომრებიც ნახევარ საუკუნეზე მეტია წარუშლელ შთაბეჭდილებას ახდენს მნახველზე. „ჩიკაგოს“ ოფიციალური ლიცენზია „წისქვილი ჯგუფმა“ სპეციალურად თეატრალური კომპანია Concord Threatricals-სგან მოიპოვა, მის დადგმაზე კი მულტიფუნქციურმა სივრცე „თეატრის“ შემოქმედებითმა ჯგუფმა იმუშავა.
სანამ თავად გახდებით ბოლო დროის ერთ-ერთი ყველაზე მასშტაბური შოუს მონაწილე, ჩვენ მოგიყვებით „ჩიკაგოს“ მდიდარ ისტორიაზე და გაგაცნობთ იმ მიზეზებს, რომლებმაც მიუზიკლი ჟანრის ლეგენდად აქცია.
„ჩიკაგო“ – ყველაზე დიდი ისტორიის მქონე მიუზიკლი
„ჩიკაგო“ პირველად მაყურებლის წინაშე ნიუ იორკში, ბროდვეიზე, 1975 წელს წარდგა. მას შემდეგ მან მსოფლიოს თითქმის ყველა კუთხეში იმოგზაურა, დაიდგა 36-ზე მეტ ქვეყანაში და ნახა 32 მილიონზე მეტმა მაყურებლებმა. 2002 წელს ფართო აუდიტორიამ „ჩიკაგოს“ ეკრანიზაციაც იხილა, რამაც კიდევ უფრო შეუწყო ხელი მიუზიკლის პოპულარიზაციას. რობ მარშალის რეჟისორობით გადაღებული ფილმი, რომელშიც მთავარ როლებს კეტრინ ზეტა ჯონსი და რენე ზელვეგერი ასრულებენ, ოსკარის დაჯილდოებაზე წლის სურათად დასახელდა.
მიუზიკლ „ჩიკაგოს“ სხვადასხვა დროს მინიჭებული აქვს თეატრალური ინდუსტრიის ერთ-ერთი ყველაზე პრესტიჟული Tony Awards-ის ჯილდოები, მათ შორის, საუკეთესო მიუზიკლის, საუკეთესო რეჟისურისა და საუკეთესო ქორეოგრაფიის კატეგორიებში.
ნამდვილი ფაქტები და პერსონაჟები
 |  |
მიუზიკლი „ჩიკაგო“ მაურინ დალას უოტკინსის მიერ 1926 წელს დაწერილ ნაწარმოებს ეფუძნება. უოტკინსი „ჩიკაგო თრიბუთის“ კრიმინალური განყოფილების ჟურნალისტი იყო, რომელიც აქტიურად ესწრებოდა და აშუქებდა იმ დროის სასამართლო პროცესებს. მათ შორის, ის თვალს ადევნებდა ორი გამორჩეულად საინტერესო ქალის, ბელვა გარტნერისა და ბეულა ანანის სასამართლოებს. უოტკინსმა ნაწარმოების ინსპირაცია სწორედ მათ გარშემო დატრიალებული ნამდვილი ამბებისგან მიიღო, ეს ორი დამნაშავე ქალი კი ნაწარმოების მთავარ პერსონაჟებად აქცია. ბელვას, რომელსაც ბრალად ქმრისა და დის მკვლელობა ედებოდა, უოტკინსის ნაწარმოებში ველმა კელის სახელით ვეცნობით. ბეულა კი, რომელიც საყვარლის მკვლელობისთვის დააკავეს, როქსი ჰარტად წარმოგვიდგება.
ნამდვილი ადამიანებისა და ისტორიების ინსპირირებით შექმნილი ნაწარმოები კიდევ უფრო ზუსტად აღწერს 1920-იანი წლების ჩიკაგოს – იმ დროინდელ სასამართლო სისტემას, მედიას, საზოგადოების ღირებულებებს, მიდრეკილებებს და მკითხველს ეპოქის სიღრმისეულად გაცნობაში ეხმარება.
უნივერსალური თემები და კულტურული პარალელები
კორუფცია, სკანდალისა და სენსაციის მაძიებელი მედია, ადვილად მანიპულირებადი სასამართლო, ადამიანთა სწრაფვა წარმატებისკენ, მყიფე ზღვარი მორალსა და ამორალურობას შორის – „ჩიკაგოს“ ეს მთავარი თემები და მასში დასმული კითხვები გეოგრაფიულ და დროით საზღვრებს სცდება. მართალია „ჩიკაგო“ ამერიკის 1920-იანი წლების საზოგადოებას აღწერს, თუმცა აქ მოთხრობილი ამბები აქტუალური და ნაცნობია თანამედროვე ეპოქასა და სხვადასხვა კულტურისთვის. ეს კიდევ ერთი მიზეზია იმისა, თუ რატომ ახდენს ერთნაირად დიდ შთაბეჭდილებას „ჩიკაგო“ სხვადასხვა ეპოქისა და სხვადასხვა ეროვნების ადამიანზე.
უნიკალური ქორეოგრაფია და მუსიკა
„ჩიკაგოს“ ქორეოგრაფია ბობ ფოსს, ამერიკის თეატრის ისტორიაში ერთ-ერთ ყველაზე გავლენიან და გამორჩეული ხელწერის მქონე ქორეოგრაფსა და მოცეკვავეს ეკუთვნის. მან შეძლო შეექმნა უნიკალური სტილი, მხოლოდ „ჩიკაგოსთვის“ დამახასიათებელი მოძრაობები, ჟესტები და სიტყვების გარეშე გადმოეცა პერსონაჟის ხასიათი, განწყობა თუ სათქმელი.
არანაკლებ შთამბეჭდავია მიუზიკლში გაჟღერებული მუსიკა და სიმღერების ტექსტები, რომლებზეც კომპოზიტორმა ჯონ კენდერმა და ლირიკოსმა ფრედ ებმა იმუშავეს. სწორედ დასამახსოვრებელი მელოდიები, სატირითა და შავი იუმორით გაჯერებული ტექსტები და ქორეოგრაფიული სტილი ქმნის „ჩიკაგოს“ უნიკალურ სახეს და მიუზიკლი სრულიად ახალ საფეხურზე აჰყავს.
ჩიკაგოდან თბილისამდე – მიუზიკლი საქართველოში
 |  |
ჩიკაგოს რუკაზე უკვე საქართველოც გამოჩნდა და მიუზიკლის მრავალმილიონიან მნახველთა რიცხვს ქართველი მაყურებელიც შეუერთდა. ამიერიდან ნებისმიერი მსურველი შეძლებს „თეატრის“ სივრცეში დატკბეს ჟანრის კლასიკად ქცეული „ჩიკაგოს“ ქორეოგრაფიულ-მუსიკალური ნომრებით, იმოგზაუროს გასული საუკუნის ამერიკაში და გაავლოს პარალელები დღევანდელ ეპოქასთან. შოუს მსვლელობისას კი ისიამოვნოს სპეციალურად წარმოდგენისთვის შექმნილი კერძებით.
„ჩიკაგოს“ შემდეგი წარმოდგენები „თეატრში“ 6 და 24 ოქტომბერს გაიმართება.
ქორწილის/კორპორაციული/კერძო ღონისძიების დასაჯავშნად დაგვიკავშირდით: 032 2 88 88 80
