ქართული შოუ საქართველოს ეკონომიკისა და მდგრადი განვითარების მინისტრის მოადგილე მარიამ ქვრივიშვილმა გახსნა
მულტიფუნქციურ სივრცე „თეატრში“ ახალი წარმოდგენის, „ქართული შოუს“ პრემიერა შედგა, რომელიც სტუმრებს საქართველოს ისტორიას, ქართულ კულტურასა და გასტრონომიას განსხვავებული ფორმით აცნობს. „ქართული შოუ“ საქართველოს ეკონომიკისა და მდგრადი განვითარების მინისტრის მოადგილემ, მარიამ ქვრივიშვილმა გახსნა და „თეატრს“ მორიგი დადგმის პრემიერა მიულოცა. ამის შესახებ ინფორმაციას "წისქვილი ჯგუფი" ავრცელებს.
მარიამ ქვრივიშვილის განცხადებით, „თეატრის“ პროექტები უკვე იხილა და მოიწონა როგორც ქართულმა, ისე საერთაშორისო საზოგადოებამ და არც „ქართული შოუ“ იქნება გამონაკლისი.
„თეატრის პროექტები უკვე იხილა და მოიწონა როგორც ქართულმა, ისე საერთაშორისო საზოგადოებამ. დარწმუნებული ვარ, არც „ქართული შოუ“ იქნება გამონაკლისი და მომდევნო კვირების განმავლობაში კიდევ უფრო მეტ სტუმარს, მათ შორის ტურისტს, ვიხილავთ თქვენს სივრცეში. ძალიან მნიშვნელოვანია, მათ ღირსეულად გავაცნოთ ჩვენი ქვეყნის საამაყო კულტურა, ისტორია, გასტრონომია და ყველაფერი ის, რაც ქმნის საქართველოს ბედს“, - აღნიშნა მარიამ ქვრივიშვილმა.
„ქართული შოუ“ სტუმრებს წარუდგენს ქართული ქორეოგრაფიისა და ფოლკლორის საუკეთესო ნიმუშებს, კლასიკურ სიმღერებსა და ქვეყნის უნიკალურ სამზარეულოს. წარმოდგენა ქართული ნაციონალური ბალეტის „სუხიშვილების“ მონაწილეობით შეიქმნა. ანსამბლმა „თეატრის“ სცენაზე შეასრულა გამორჩეული ქართული ცეკვები, ფოლკლორული და კლასიკური სიმღერები კი „თეატრის“ გუნდისა და მარიამ როინიშვილის შესრულებით გაჟღერდა.
მწერალმა აკა მორჩილაძემ „ქართული შოუსთვის“ საგანგებოდ შექმნა ტექსტები, რომლებიც სტუმრებს საქართველოს მრავალსაუკუნოვან ისტორიას მხატვრული ფორმით მოუთხრობდა. შოუს ვიზუალურ მხარეზე მედია და ციფრული კომუნიკაციების სააგენტო „კლიპარტმა“ იმუშავა.
„ქართული შოუ“ არაჩვეულებრივი საშუალება იქნება უცხოელი სტუმრებისთვის გაიცნონ ქვეყნის მრავალსაუკუნოვანი ისტორია, მისი კულტურული და გასტრონომიული მემკვიდრეობა და თან ისიამოვნონ შთამბეჭდავი სანახაობით. შოუ ვერც ადგილობრივ სტუმრებს დატოვებს გულგრილს, რადგან „თეატრის“ ახალი დადგმა საქართველოს ისტორიაში მოგზაურობის უნიკალურ გამოცდილებას ქმნის“, – ამბობს „წისქვილი ჯგუფის“ მარკეტინგის ხელმძღვანელი, ანანო თავხელიძე.
მულტიფუნქციურ სივრცე „თეატრში“ „ქართული შოუ“ ყოველ სამშაბათს გაიმართება.
ქორწილის/კორპორაციული/კერძო ღონისძიების დასაჯავშნად დაგვიკავშირდით: 032 2 88 88 80
